Ushiriki wa HTAF katika Mdahalo wa Utalii Tiba ulioandaliwa na JKCI kwa Maadhimisho ya Miaka Kumi ya Mafanikio tarehe 15/8/2025

Katika kuadhimisha miaka kumi ya mafanikio tangu kuanzishwa kwake, Taasisi ya Moyo ya Jakaya Kikwete (JKCI) iliandaa mdahalo maalum wa Utalii Tiba, wenye lengo la kujadili mchango wa sekta ya afya katika kukuza uchumi kupitia huduma za kibingwa zinazowavutia wagonjwa kutoka ndani na nje ya nchi. Miongoni mwa taasisi zilizoshiriki kwa karibu katika mdahalo huo ni Heart Team Africa Foundation (HTAF), ambayo imekuwa mshirika muhimu wa JKCI katika kusaidia wagonjwa wenye matatizo ya moyo, hususan watoto wanaohitaji upasuaji maalum. Kupitia ushiriki wake, HTAF iliwasilisha mchango wake katika kuhamasisha jamii kuhusu umuhimu wa utalii tiba, pamoja na kusaidia harakati za kuchangisha fedha kwa ajili ya matibabu ya moyo kwa watoto. Aidha, HTAF ilisisitiza umuhimu wa ushirikiano kati ya sekta binafsi na taasisi za umma katika kuboresha huduma za afya na kuifanya Tanzania kuwa kitovu cha huduma za moyo barani Afrika. Mdahalo huo ulihudhuriwa na wadau mbalimbali wakiwemo wataalamu wa afya, washirika wa maendeleo, wawekezaji, na wawakilishi wa serikali, ambapo wote walikiri mchango mkubwa wa JKCI katika kupunguza gharama za matibabu ya nje ya nchi na kuchochea maendeleo ya utalii wa tiba nchini.